सा.अ.सं. काठमाडौँ
वैदेशिक रोजगारीको सपना बोकेर कुवेत पुगेका तीन सयभन्दा बढी नेपाली घर फर्कन बाध्य भएका छन्। कुवेत सरकारले नियम उल्लंघन गरेको भन्दै उनीहरूलाई एकैपटक नेपाल फर्काएको हो।
बुधबार कुवत एयरवेजको विशेष उडानमार्फत उनीहरूलाई भैरहवास्थित गौतम बुद्ध अन्तर्राष्ट्रिय विमानस्थल पठाइएको छ। सोही उडानमा कुवेतमा विभिन्न कारणले ज्यान गुमाएका ९ जना नेपालीको शव पनि स्वदेश पठाइएको गैरआवासीय नेपाली संघ (एनआरएनए) कुवेतले जनाएको छ।
कुवेतको आन्तरिक मामिला मन्त्रालय र नेपाली दूतावासको समन्वयमा यो प्रक्रिया अघि बढाइएको हो। कानुनी तथा प्रशासनिक नियम उल्लंघन गर्नेहरूलाई यसरी एकैपटक ठूलो संख्यामा फर्काइएपछि विदेशमा रहेका नेपाली कामदारको अवस्थाले पुनः ध्यानाकर्षण गरेको छ।
विमानस्थल नै बन्द गरेर पठाइयो उडान
प्राप्त जानकारीअनुसार, डिपोर्ट गरिएका नेपालीलाई फर्काउन कुवेत अन्तर्राष्ट्रिय विमानस्थल अन्य यात्रुका लागि पूर्णरूपमा बन्द गरिएको थियो। उनीहरूलाई मात्रै फर्काउनका लागि यो विशेष व्यवस्था गरिएको बताइएको छ।
सो उडान बुधबार साँझ करिब ६ बजे भैरहवा अन्तर्राष्ट्रिय विमानस्थलमा अवतरण गर्ने तालिका छ। परिवारका सदस्य र आफन्तहरू विमानस्थल पुगिसकेका छन्। उनीहरूको अनुहारमा चिन्ता र अप्ठ्यारोको मिश्रित भाव देखिन्थ्यो।
किन डिपोर्ट भए?
वैदेशिक रोजगारीको क्रममा कुवेत पुगेका नेपालीहरू प्रायः भिसा अवधि नवीकरण नगर्ने, काम परिवर्तन गर्ने, वा गैरकानुनी रूपमा बस्न बाध्य हुनेजस्ता कारणले यस्तो समस्यामा पर्ने गरेका छन्। कतिपयले रोजगारदातासँगको विवाद, कागजातको जटिलता र आर्थिक अभावले नियमित अवस्थामा रहन नसक्दा यस्तो परिणाम भोग्नुपरेको हो।
यस घटनाले एउटै परिवारको गुजारा चलाउन परदेश पुगेका हजारौं नेपालीले सानो त्रुटीले पनि ठूलो मूल्य चुक्ता गर्नुपर्ने वास्तविकता फेरि एकपटक देखाएको छ।
९ जनाको शव फर्कियो
डिपोर्टीहरूसँगै ९ जना नेपालीको शव पनि सोही उडानमार्फत नेपाल ल्याइएको छ। विभिन्न कारणले कुवेतमा ज्यान गुमाएका ती नेपालीको पार्थिव शरीर परिवारलाई बुझाउने प्रक्रिया अगाडि बढाइएको छ।
एनआरएनए कुवेतले शव फर्काउन र डिपोर्टीहरूको व्यवस्थापनमा सहजीकरण गरेको जनाएको छ।
विदेश जाँदा यी कुरामा सजगता जरुरी
यस घटनाले वैदेशिक रोजगारीमा जाने नेपालीले सम्बन्धित देशको कानुन र नियमलाई गम्भीरतापूर्वक बुझ्न र पालना गर्न आवश्यक रहेको देखाएको छ। भिसाको म्याद, कामको प्रकृति, रोजगारदातासँगको सम्झौता, कागजातको अद्यावधिक जस्ता विषयमा सधैँ सचेत रहनुपर्ने विज्ञहरू बताउँछन्।
यस्तै, सरकार र सम्बन्धित निकायहरूले पनि वैदेशिक रोजगारीमा जानेहरूलाई पूर्ण जानकारी दिने, पूर्व–रोजगारी अभिमुखीकरणलाई प्रभावकारी बनाउने, र संकटको अवस्थामा उद्धार र सहजीकरणको व्यवस्थालाई थप चुस्त बनाउन आवश्यक देखिएको छ।
बुधबार साँझ भैरहवा विमानस्थलमा अवतरण गर्ने यो विशेष उडानले परदेशको माटोमा सपना बुन्न पुगेका तर बाध्यताले घर फर्कनुपर्ने ती नेपालीका लागि नयाँ संघर्षको बाटो भने खोलेको छ।
